ماڭعىستاۋ وبلىسى اكىمدىگىنىڭ باستاماسىمەن ۇيىمداستىرىلعان سايىستىڭ ماقساتى – ايتىس ونەرىنىڭ دامۋىنا مەملەكەتتىك دەڭگەيدە قولداۋ كورسەتۋ, ەلىمىزدىڭ تاۋەلسىزدىك جىلدارىندا قول جەتكىزگەن قۇندىلىقتارىن, وڭىردە جۇزەگە اسىرىلىپ جاتقان جاسامپاز جوبالاردى دارىپتەۋ, ماڭعىستاۋ ايتىس مەكتەبىنىڭ شىعارماشىلىق الەۋەتىن ناسيحاتتاۋ.
- ابىل مەن نۇرىم, قاشاعان مەن ساتتىعۇلداي ءسوز زەرگەرلەرىن تۋدىرعان ماڭعىستاۋ توپىراعىندا, كونەدەن جەتكەن بەكزات ونەر, سۋىرىپ سالمالىق-يمپروۆيزاتورلىق شىعارماشىلىقتىڭ بيىك شىڭى – ايتىستىڭ شابىسى قايتا جاڭعىردى. ايتىس – بەت جىرتىسىپ, جاۋاپتاسۋ ەمەس, ساياساتتان ادا, وردالى ويى, سۇڭعىلا سوزىمەن تىڭدارماننىڭ كوڭىل تۇكپىرىنە وي سالىپ, زامانا سازىن تولعاپ, ەلدىككە, ىنتىماققا ۇندەۋ! حالىق جازۋشىسى ءابىش كەكىلباي ۇلىنىڭ سوزىمەن ايتار بولساق: «بيىك تالعامدى تەك ساليحالى ونەر, سالاۋاتتى سۋرەتكەر عانا وسىرەدى. بيىك تالعامسىز بيىك پاراسات جوق. ال بيىك پاراسات ۇلكەن جاۋاپكەرشىلىك. بۇگىنگى ۇلكەن وزگەرىستەر ونسىز جۇزەگە اسا المايدى. رۋحاني بەدەرسىزدىك ساياسي تاۋەلسىزدىكتى دە تارك ەتەدى». سەبەبى, سانا وزگەرمەي, ساپا وزگەرمەيدى. سوندىقتان اقىندارىمىز «رۋحاني جاڭعىرۋ» ۇعىمىن تەرەڭنەن تالداپ, وسى ۇعىم اياسىنداعى وتانسۇيگىشتىك, تاۋەلسىز ەلىمىزدىڭ جەتىستىكتەرىن جان-جاقتى جىرلاي بىلۋلەرى كەرەك. ءسوز قادىرى تومەندەمەي, بۇگىنگى ايتىستىڭ ءدۇبىرى دۇنيەنى شارلاسىن, تىڭداۋشىنىڭ قۇلاق قۇرىشىن قاندىرسىن! مەرەكەمىز قۇتتى بولسىن! - دەدى ايماق باسشىسى ەرالى توعجانوۆ.
جىر بايگەسىنە ءوڭىردىڭ ءار تۇكپىرىنەن 16 اقىن قاتىسۋدا. ولاردىڭ قاتارىندا مەلس قوسىمباەۆ, مۇحتار نيازوۆ, رۇستەم قايىرتاي ۇلى, اسەم ەرەجەقىزى, جانسايا مۋسينا, شالقارباي ءىزباساروۆ, قازىرەت بەردىحان, اسپانبەك شۇعاتاەۆ, ماقسات احانوۆ, ەرشات قايبولدين, شۇعايىپ سەزىمحان ۇلى, جانار ايلاشوۆا, فارحاد مۇساەۆ, اباي جولماعانبەتوۆ, التىنبەك سۇيىنبەك ۇلى, ازامات ورىنباساروۆ سىندى اقىندار بار.
سۇلۋ ءسوزدىڭ كەرەمەتىن كورسەتىپ, ولەڭ قۇمار قاۋىمنىڭ ءشولىن قاندىرعان دودادا ايتىسكەرلەردىڭ وت اۋىزدىلىعى, وتكىرلىگى, شەشەندىلىگى باعالانباق. ولاردى ساراپتاپ, تورەلىك ەتەتىن قازىلار القاسىنىڭ مۇشەلەرى دە وسال ەمەس. قازىلار قۇرامىندا جازۋشى, كينودراماتۋرگ, جازۋشىلار وداعىنىڭ حاتشىسى سماعۇل ەلۋباەۆ, قازاقستان جازۋشىلار وداعى مەن قازاقستان جۋرناليستەر وداعىنىڭ مۇشەسى, قازاقستان رەسپۋبليكاسى پرەزيدەنتىنىڭ بۇقارالىق اقپارات قۇرالدارى سالاسىنداعى سىيلىعىنىڭ لاۋرەاتى نامازالى وماشەۆ, قر حالىق اقىنى, قر مادەنيەت سالاسىنىڭ ۇزدىگى ءاسيا بەركەنوۆا, قازاقستان جازۋشىلار وداعىنىڭ مۇشەسى, حالىقارالىق «الاش» سىيلىعىنىڭ جانە قازاقستان رەسپۋبليكاسىنىڭ مەملەكەتتىك سىيلىعىن يەگەرى نەسىپبەك ايت, قر جازۋشىلار وداعىنىڭ مۇشەسى سۆەتقالي نۇرجان بار.
سونداي-اق, شارا اياسىندا «ەلباسى جانە رۋحى جاڭعىرعان ماڭعىستاۋ» دەپ اتالاتىن فوتوكورمە ءوتتى. كورمەگە 100-گە جۋىق سۋرەتتەر قويىلعان. ماڭعىستاۋ وبلىسىنىڭ اكىمى ەرالى توعجانوۆ ارنايى بارىپ, ەلباسىنىڭ وڭىرىمىزدەگى ساپارى بارىسىنداعى سۋرەتتەر مەن ايماقتا وتكەن تاريحي شارالاردىڭ كورىنىسىن تاماشالادى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
